!أنت مش أنت
بص بقي يا معلم, اختلف الناس في موضوع أنا ايه, كتير اختلف مع غيره و اختلف مع نفسه لحد مازهق وكبر دماغه,فتعالي ننكد عليه وعليك أنت مش الوعاء الطيني اللي بتقعد تزوق فيه طول حياتك و تتصور بيه سلفي أنت مع أول فرصه بتجيلك بتسيبه و تجري ما هو حابسك جواه, بس نقول ايه نموت في اللي يحبسنا و نمجده و نشوف شكله حلو و لو مش حلو نخليه حلو
(typical human behavior)
فاكر انت لما كنت بتتصور في وسط جروب و حسيت انك عملت بوز لوشك و دخلت جواك و قاعد تفكر ياتري شكلي عامل ايه و هطلع في الصوره عامل ازاي و ساعتها فعلا تشوف شكلك, اهو اللى جوه ده انت اكتر من اللي بره!
فاكر انت لما كنت في مصيبه كبيرة و لقيت جواك صوت بيقولك مش هتخلص كده و هتعدي و انك مش هتموت او ان حياتك منتهتش اهوالصوت اللي جواك ده صوتك اكتر من الصوت اللي بيطلع للناس.
فاكر لما كنت ماشي في الشارع وفجأه ركزت مع موقف و حسيت للحظه ان الدنيا بقت ابطئ انك ليك دور في اللي بيحصل ده و فعلا اتصرفت ودخلت جوا الموقف و كان ليك دور في حله حتي لو بضحكه و كلمه كويسه اهو الدافع اللي حركك ده نابع منك انت.
انت فاكر لما عملت حاجه بره السياق بس مقتنع بيها و شايفها صح و الناس اللي حواليك كلهم هاجمواك و حتي اتريقوا عليك لمجرد انك مش زيهم اهو اللي رافض يبقي زيهم و بيشجعك و مديك الطاقه انك تكمل هو انت.
تفرق ايه انت عن خيال المآته؟ (هي دمية عادة على شكل إنسان مصنوعة من القش المخبأ في ثياب. تستخدم عادة لإخافة الطيور أو كأهداف للتدريب على الرمي أو ضربات السيف أو كدمى للحرق أو للفت انتباه الثيران)
لما انت بتطلع من جسمك بتبقي خيال مآته ,لما انت مبتسمعش صوتك و تعمل اللي مقتنع بيه بتبقي خيال مآته, لما انت تتصرف زي مالناس بتتصرف لمجرد انهم بيتصرفوا كده يبقي انت خيال مآته ,تتساق يامعلم مع المتساقين يبقي كبيرك تتحط في حتة في غيط يخوفوا بيك اللي زيك . فكر بقي انت كنت كام مره خيال مآته ؟ شوف كام واحد شغلته في حياتك انه يخليك خيال مآته؟
أرفض ..اتحرك .. اسمعك .. حارب عشانك!
اول حاجه بتسبيها لما بتموت هو جسمك اللي بتقعد طول حياتك تحافظ عليه و تستخدمه بالشوكه و السكينه والوايبس
انت عارف اول متسيبه بيحصل ليه ايه ؟ بيتحلل ويبقى تراب يا معلم, بتضيع حياتك هنا علي تراب, ايه الجمدان و العبقريه دي!! ده انت حتي اول ماتنام بتسيبه و تمشي تلف في ملك الله بامر الله
من ساعة ما بتتولد و يبدا الادراك عندك يشتغل يبتدي يتحط عليك قيود و عوازل تحبسك جوا جسمك و تشغلك بشكلك الزائل قدام الناس و تدفنك جوا سجنك اكتر. العجيب انك بتسمح لغيرك انه يسلب منك حريتك بنفسك و المدهش انك بتوهم نفسك انك مبسوط .
بنتولد بنحب الحريه و بندافع عنها بكل قوه لحد مانحس اننا لوحدنا و نخاف من ده فنرجع تاني في السياق اللي مرسوم لينا من غيرنا متخفش من انك لوحدك شويه وهتلاقياللى زيك واللى شبهك ..ماتخفش
ألم تسأم بعد دور خيال الماته ؟ ألم يحن الوقت للتحرر؟
No comments:
Post a Comment